വാഴക്കാട് :പൗരപ്രശ്നങ്ങൾക്ക് പരിഹാരവുമായി വാഴക്കാട് ഗ്രാമപഞ്ചായത്ത് ഭരണസമിതിയുടെ നേതൃത്വത്തിൽ സംഘടിപ്പിച്ച ജനസഭ ടി.വി ഇബ്രാഹിം എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡണ്ട് അഡ്വ.എം.കെ നൗഷാദ് അധ്യക്ഷത വഹിച്ചു. ജനകീയ പ്രശ്നപരിഹാരങ്ങൾക്കായി സംസ്ഥാനത്ത് തന്നെ ആദ്യമായി ഒരു പ്രാദേശിക ഭരണകൂടം എന്ന നിലയിൽ വാഴക്കാട് ഗ്രാമപഞ്ചായത്ത് സംഘടിപ്പിച്ച ജനസഭ മാതൃകാപരമാണെന്ന് ടിവി ഇബ്രാഹിം എംഎൽഎ പറഞ്ഞു.
പഞ്ചായത്തിൽ നൽകിയ അപേക്ഷകളിലെ തീർപ്പ് കൽപ്പിക്കൽ, പ്രാദേശിക വികസനവുമായി ബന്ധപ്പെട്ട പരാതികൾ, നിത്യ ചികിത്സയുമായി ബന്ധപ്പെട്ട പ്രയാസങ്ങൾ, ദൈനംദിന ഭക്ഷണത്തിന് ബുദ്ധിമുട്ടനുഭവിക്കുന്നവരുടെ പ്രയാസങ്ങൾ, വഴി സംബന്ധമായ പ്രശ്നങ്ങൾ, അയൽപ്പക്ക ബന്ധങ്ങളിൽ അസ്വാരസ്യങ്ങൾ, കുടുംബ പ്രശ്നങ്ങൾ, കുട്ടികളുടെ വിദ്യാഭ്യാസ പ്രശ്നങ്ങൾ തുടങ്ങി വിവിധ പ്രശ്നങ്ങളാണ് ജനസഭയിൽ ഉന്നയിക്കപ്പെട്ടത്. ചികിത്സയുമായി ബന്ധപ്പെട്ട് മുൻകൂട്ടി അപേക്ഷ നൽകിയ മുഴുവനാളുകൾക്കും , ഭക്ഷണ പ്രയാസങ്ങൾ ഉന്നയിച്ചവർക്കും ഭക്ഷണത്തിനും മരുന്നിനുമായി പ്രത്യേക കൂപ്പണുകൾ കൈമാറി.
വഴി പ്രശ്നങ്ങൾ ഉൾപ്പെടെ എതിർകക്ഷികളുമായി സംസാരിച്ച് പരിഹരിക്കേണ്ട പ്രശ്നങ്ങൾക്ക് തീർപ്പ് കൽപ്പിക്കാൻ പ്രത്യേക തിയ്യതികൾ നിശ്ചയിച്ചു. വില്ലേജ് ഓഫീസർ, അസ്സിസ്റ്റന്റ് എൻജിനിയർ (വാട്ടർ അതോരിറ്റി ,കെ.എസ്.ഇ.ബി), കൃഷി വികസന ഓഫീസർ തുടങ്ങിയവർ വിവിധ പരാതികള്ക്ക് പരിഹാര നിർദ്ധേശങ്ങള് നൽകി.
About the Author
