പത്തനംതിട്ട ജനറല് ആശുപത്രിയിലെ ചികിത്സയില് വീഴ്ചയുണ്ടായെന്നാരോപിച്ച് പരാതി ഉന്നയിച്ചു. കൈക്ക് പരിക്കേറ്റ് എത്തിയ ഓമല്ലൂര് സ്വദേശികളായ ദമ്പതികളുടെ ഏഴുവയസ്സുള്ള മകനെ ചികിത്സിച്ചതില് ഗുരുതര വീഴ്ചയെന്നാണ് പരാതി. കൈയില് ഉണ്ടായിരുന്ന ചതവ് പരിഗണിക്കാതെ നേരിട്ട് പ്ലാസ്റ്റര് ഇടുകയായിരുന്നു. തുടര്ന്ന് കൈ പഴുത്ത് വ്രണമാകുകയും കുട്ടി കഠിന വേദന അനുഭവിക്കുകയും ചെയ്തതായി രക്ഷിതാക്കള് പറഞ്ഞു.
രണ്ടാഴ്ച മുമ്പ് സൈക്കിളില്നിന്ന് വീണ് കൈപ്പത്തിക്ക് പരിക്കേറ്റ കുട്ടിയെ ആശുപത്രിയില് എത്തിച്ചതിന് ശേഷം അസ്ഥി പൊട്ടിയെന്നു പറഞ്ഞ് പ്ലാസ്റ്റര് ഇടുകയും വീട്ടിലേക്ക് വിട്ടയക്കുകയും ചെയ്തിരുന്നു. എന്നാല് തുടര്ന്ന് വേദന കൂടുകയും പഴുപ്പ് രൂപപ്പെടുകയും ചെയ്തതായി പിതാവ് മനോജ് പറഞ്ഞു. വീണ്ടും ആശുപത്രിയില് കൊണ്ടുപോയപ്പോഴും ഡോക്ടര് ഗൗരവകരമായി പരിഗണന നല്കിയില്ല.
അവസാനം രക്തവും പഴുപ്പും പുറത്തുവന്നതോടെ കോട്ടയം മെഡിക്കല് കോളജിലേക്ക് കൊണ്ടുപോകാന് നിര്ദേശിച്ചെങ്കിലും, മറ്റൊരു ഡോക്ടറുടെ ഉപദേശപ്രകാരം കുട്ടിയെ തിരുവല്ലയിലെ സ്വകാര്യ ആശുപത്രിയിലേക്ക് മാറ്റി. അവിടെ നടത്തിയ പരിശോധനയില് കൈയ്ക്ക് ഗുരുതര ചതവുണ്ടായിരുന്നുവെന്നും അത് പരിഗണിക്കാതെ പ്ലാസ്റ്റര് ഇടുകയായിരുന്നു എന്നും ഡോക്ടര്മാര് വ്യക്തമാക്കി. കുട്ടിക്ക് ശസ്ത്രക്രിയ നടത്തുകയും ഇപ്പോള് സുഖം പ്രാപിക്കുന്നുണ്ടെന്നും ആശുപത്രി അധികൃതര് അറിയിച്ചു.
About the Author
