ന്യൂഡല്ഹി: ഉത്തരാഖണ്ഡില് കടയുടെ പേര് മാറ്റണമെന്ന് ആവശ്യപ്പെട്ട് മുസ്ലിം കച്ചവടക്കാരനെ ഭീഷണിപ്പെടുത്തിയ ബജ്റംഗ്ദള് പ്രവര്ത്തകരെ തടഞ്ഞ ദീപക് കുമാര് എന്ന യുവാവിന് പിന്തുണയുമായി ലോക്സഭാ പ്രതിപക്ഷ നേതാവ് രാഹുല് ഗാന്ധി. ദീപക് ഇന്ത്യയുടെ ഹീറോയാണെന്നും അദ്ദേഹം മനുഷ്യത്വത്തിനും ഭരണഘടനയ്ക്കും വേണ്ടി പോരാടുകയാണെന്നും രാഹുല് ഗാന്ധി പറഞ്ഞു. സംഘപരിവാര് രാജ്യത്തെ വിഷലിപ്തമാക്കുമ്പോള് തലകുനിക്കാത്ത ദീപക്കുമാരെയാണ് നമുക്കാവശ്യമെന്നും വെറുപ്പിന്റെ വിപണിയില് സ്നേഹത്തിന്റെ കട തുറക്കുകയാണ് അദ്ദേഹമെന്നും രാഹുല് പറഞ്ഞു. ദീപക്കിന്റെ ചിത്രം പങ്കുവെച്ചുകൊണ്ടാണ് രാഹുല് ഗാന്ധിയുടെ പ്രതികരണം.
ജനുവരി 26-നാണ് ഉത്തരാഖണ്ഡിലെ കോട്ദ്വാറില് എഴുപതുകാരനായ വകീല് അഹമ്മദ് എന്ന കച്ചവടക്കാരന്റെ ബാബ സ്കൂള് ഡ്രസ് ആന്ഡ് മാച്ചിംഗ് സെന്റര് എന്ന കടയുടെ പേരിലെ ബാബ എന്ന വാക്ക് മാറ്റണമെന്നാവശ്യപ്പെട്ട് ബജ്റംഗ്ദള് പ്രവര്ത്തകര് ബഹളമുണ്ടാക്കിയത്. ഒരുകൂട്ടം ബജ്റംഗ്ദള് പ്രവര്ത്തകര് കടയിലെത്തി അഹമ്മദിനെ ഭീഷണിപ്പെടുത്തുകയായിരുന്നു. ഈ സമയം തൊട്ടടുത്ത കടയിലുണ്ടായിരുന്ന ദീപക് ഇടപെടുകയും ബജ്റംഗ്ദള് പ്രവര്ത്തകരെ നേരിടുകയുമായിരുന്നു.
ഇന്ത്യയില് മുസ്ലിംങ്ങള് രണ്ടാംകിട പൗരന്മാരാണോ എന്നും മുപ്പത് വര്ഷത്തിലേറെയായി ഇവിടെ തുടരുന്ന കടയുടെ പേര് എന്തിന് മാറ്റണമെന്നും ദീപക് ബജ്റംഗ്ദള് പ്രവര്ത്തകരോട് ചോദിച്ചു. പേരാണ് നിങ്ങളുടെ പ്രശ്നമെങ്കില് എന്റെ പേര് മുഹമ്മദ് ദീപക് എന്നാണ്, ഇനി ആര്ക്കാണ് പ്രശ്നം എന്നുകൂടി ദീപക് ചോദിച്ചു. ദീപക്കിനെ പിന്തുണച്ച് സമീപത്തുളള യുവാക്കള് കൂടി രംഗത്തെത്തിയതോടെ ബജ്റംഗ്ദള് പ്രവര്ത്തകര് പിന്തിരിയുകയായിരുന്നു. ഇതിന്റെ വീഡിയോ സമൂഹമാധ്യമങ്ങളില് വ്യാപകമായി പ്രചരിക്കുകയും ചെയ്തു
About the Author
